因為我相信有唔少朋友同我一樣，初次兌換咩都唔識，
所以就分享一下我嘅經驗。
話說啱啱嘅9月，我心血來潮，好想出年去北海道睇花。
但由於儲緊錢，又唔想使咁多，於是就決定睇下用唔用到里數換喇！
去到亞洲萬里通個網，我首先就入左飛行獎勵，
因為我一心諗住換直航，所以揀直接兌換！
而呢個方法，只係可以兌換下面幾間航空公司:
- 國泰航空
- 港龍航空
- 英國航空
- 澳洲航空
- 卡塔爾航空
- 芬蘭航空
結果得到嘅係...滿座
通常獎勵機票可以係一年前 (365日左加)開始有得換，
我呢啲得返十個月嘅朋友，就只能望住「滿座」兩隻字啊。
喂啊～但我真係好想去，
所以即刻上網搵下Waiting List要等幾耐啦~
但原來短則幾日，長則去到你飛前幾日先通知。
所以就決定採用方法二: 轉機!
咁玩到轉機呢，又要搵第二樣野幫下手，就係搜尋飛行獎勵。
點解呢？因為假如你要去第二到轉機，如果個到本身嘅里數區大過你原來目的地，
咁樣你就要俾多啲里數架喇！
因為要轉機嘅關係，所以揀左轉機地點之後，要再禁增加航班
每次最多可加至４班航班，如果想飛多啲地方，可能就要分兩次換／俾錢買機票喇!
我咁樣東京轉機，當中可以揀幾日留係東京玩，而所用嘅里數都係3萬里!
咁因為我本身轉機想坐日航，但日航又唔屬於上面所講嘅航空公司，
咁我就信佢，走左入去填呢份野。
我其實一早係英航個網揀好哂邊班機 (下次出Post講)，點知佢唔俾我入航班編號，
按個問題，佢就彈右手邊個時間表出黎。
咁算啦，我揀我想要個時段先，因為我知道佢熱線好難打，所以先想網上交表。
好喇，當我打好哂啲野，即係咩個人資料啊，兌換人個啲，遞交之後，
佢 竟 然 淨 係 彈 出 「７天內會有專人聯絡」 嘅字眼，
咩參考編號／確認電郵都無。
咁算啦，我聽下話，但等左兩日，咩消息都無，我又好驚我想搭嘅航班會無咗，
咁所以我都唯有做下煩人，打熱線: 2312 0883
我上網睇過，有人話深夜易接，又有人話啱啱返工放工 (朝9晚6)易接，
但我打足兩日，呢啲時間都係響咗一轉，就叫我留言。
哼，我無再咁易中計，結果有朝，我返工途中打去，響咗一下，就有人聽喇！
咁我梗係講返我嘅情況俾佢聽，話我想指定返航班啦，
點知，佢叫我俾資料佢check之後，話佢哋個邊無我交過表嘅紀錄！！！
呢個亦係我呆等幾日都無電話嘅原因。
咁我當然即刻叫佢幫我電話留機位，結果用咗十分鐘左右，就已經搞掂。
當日下晝仲出埋eticket俾我，超爽快。
是次出票費用：約$920/ 2人 (機場稅/燃油/手續費等)
機票有效期係一年，
遲啲如果有航班想改動，只需俾 20美金/ 1000里就得，
咁當然，要你想搭嘅航班有位先得啦!
我宜家可以安心揀酒店睇行程喇~Yeah
最後，
溫馨提示，
就算唔係上面所提及嘅航空公司，
都唔好用佢個兌換飛行獎勵申請表，
直接打電話啦！
最方便同最快確認。
同埋記得啊~
想換呢啲咁熱門嘅地方，
要計好一年前就換喇:P
